مرتني الدنيا

مرتني الدنيا بتسأل عن خبر ..
مابه جديد ..
عشاق ليلة تفارقوا ..
وصاروا بعيد..
لا طاحت نجوم السما ولا تاه في الظلما قمر
...لا تاقف الدنيا وتسأل عن خبر ..
مابه جديد ..
اسهل من الكذبة على شف الطفل ..
فرقى الأحبه يا هوى ..
أحلى من الحلم اللي ودي لو كمل ..
كانت ليالينا سوى ..
لا طاحت نجوم السما ولا تاه في الظلما قمر ..
لا تاقف الدنيا وتسأل عن خبر ..
مابه جديد ..
لا تاقف الدنياعلى أول طريق
فرقى الأحبه يا هوى
لا تسأل جروحي متى خان الرفيق ..
عهد المحبه والهوى
لا طاحت نجوم السما ولا تاه في الظلما قمر ..
لا تاقف الدنيا وتسأل عن خبر ..
مابه جديد ..

4

(( الشمس طاحت ))
الشمس طاحت .. وبردت..
ورمد الشفق .. في حجر الارض
من يشتهي يدوس باقدامه على هالرماد كله ..
يا عابرٍ .. على المدى .. من السراب .. الى الندى ..
قلبي سقط فوق التراب شله ..
او لا تدوس القلب خله .. كل يوم له شمس
وانا مالي سوى قلبي
انا .. من بكى لين الثرى بله بالدمع ..
ويوم اكتفى .. صد وعصر ظله .. ومسح بردنه .. وجنته ..
ثم ابتسم لين حسدوه الناس
يازارعٍ شوك الهراس .. فوق الرمل كله .. لاقدام من يكره الشوك
ياحظ من ياطى بقدم .. انا مالي سوى قلبي
الشمس طاحت ونثر الظلام ظله ..
على الجروح .. ياكاتم الزين الفضوح عن عيني
لا تظهر انيابك .. وتقطع احبابك شمات
انا من عطى ضي الشموس خله .. لين حسدوه الناس
ولا تنتظر غير السموس .. لله ..
انا مالي سوى قلبي .


بعدها ألقى البدر هذه الرائعة الخالدة :


(( ابعتذر ))

ابعتذر .. عن كل شيء ..
إلا الهوى .. ما للهوى عندي عذر ..

ابعتذر .. عن أي شي ..
إلا الجراح .. ما للجراح إلا الصبر ..

إن ضايقك اني على بابك أمرّ ..
ليلة ألم ..
واني على دربك مشيت عمري وأنا ..
قلبي القدم ..

ابعتذر ... ابعتذر ... كلي ندم ..
عن كل شيء ... إلا الهوى ..
ما للهوى عندي عذر ...

اتصدقي .. ما اخترت أنا أحبك ..
ما احدٍ يحب اللي يبي ..

ياحبي المرّ ... العذب ..
سكنتي جروحي غصب ..
ليت الهوى وانتي ... كذب ...

كان اعتذر لك عن هواي ..
ما أقول أنا ... كوني معاي ..



الله كريم .. حبك يكون ..
همي القديم ..
وجرحي القديم ..
والله عليم ... يا أحلى العيون ..
ان الفراق .. جزا الفراق ..
ابوعدك .. كان الطريق بيبعدك ..
بامشي الطريق ..
وكان الجحود بيسعدك ..
مالي رفيق ..
ابجمع أوراق السنين .. وأودعك ..
كان الفراق اللي تبين ... الله معك .

3

(( تخيل ))
تاقف على اطراف الهدب .. وماشافتك عيني ..
صافحتني ومدري يدك هي لمست ايديني ..
سلم .. ابارد السلام ..
وهذا ترى كل الكلام ..
اللي بقى بينك وبيني ..
تخيـّــل ..

من وين .. ومنين ومتى ..
بالله ذكرني ..
بالله ذكرني .. متى ..
جيتك انا فـ ليلة شتا ..
تهزني ريح الشمال ..
محتاج انا لبسمه وشال ..
تركتني لبرد الطريق وانا على بابك ..
اتذكر انك قلت لي بالله وش جابك ..
ودعتني قبل السلام .. وهذا ترى كل الكلام
اللي حصل بينك وبيني ...
تخيّــــل ..

اليوم لعيوني السما والارض البعيد ...
اليوم ولغيرك انا يطري على بالي القصيد ...
اشتقت للقلب الخلي ..
وش هم .. لو تعتب علىّ ..
جيتك انا فـ ليلة ألم .. قلبي على كفي ..
همست لي روح ياغريب الشوق مايكفي ..
سلم ابارد السلام ..
وهذا ترى كل الكلام ..
اللي بقى بينك وبيني ..
تخيّــــل



(( يذكرني القمر ظلك ))
يذكرني القمر ظلك عجب ياللي ظلالك نور
وانا اللي ماعرفت الليل لولا عتمة أهدابك

حبستك في السما شمس وعلى وجه السحاب طيور
ونخيل باسق يشرب رضاك ويعطش عتابك

وجلست اناظرك ما رف لي جفن تقل مسحور
أقول ان الجمال انتي وكل العشق باسبابك

هقيت اني ملكتك مادريت ان الأماني غرور
وانك في يدي لين انتحابي الوقت واقفا بك

سقا الله يوم كان اكبر همومك خاطري المكسور
وكنت الضي في عينك وكنت السقم في ثيابك

سقا الله يوم كنتي الارض أنهار وشجر وقصور
ديار نورها من طاقتك .. وأحلامها بابك

عيوني ياشقى عيوني من الجدب الموات البور
أراضي مابها الا ماذوى وانهد في غيابك

أحبك كان لي قلب يجض من الجفا مقهور
وصار اليوم يفرح لو لقى به عذر يشقى بك

2

(( غلال حنطه ))
لعيونك أملا صوتي غلال حنطه ..
وأظهر لكل الناس مكسور الاغلال

أطعم طيور الحزن نورٍ وغبطه ..
وأقول كل الصبح لأهدابك ظلال

ياللي بقلبي صعب حله وربطه ..
وياللي بعيني نهر جمرٍ وشلال

قال الهوى يا فرحة العمر شرطة ..
بنتٍ تصير عيونها قلب رجال

يا هيه احبك كل الاشعار سمطه ..
والله مدري كيف هالحسن ينقال

خذيت من رمل المجرات غمطه ..
لاقدامك أمشي فوق نجمات وهلال

ما نيب اعرفك كان الاحلام غلطة
وبالحيل اعرفك لو تحبين الاطفال


(( حسايف ))
التفت ..
وتوها .. توها ما اختفت ..
ماكساها الليل .. باللون الحزين ..
التفت .. وتعالت صرخته ..
في نظرته ..
صاح .. لكن بالنظر ..
وانكسر .. شوفه عثر ..

حسايف .. تذبل الضحكه وهى بين الشفايف ..
تذبل الفرحه وتضيع ..
ويصبح الكون الوسيع ..
مايكفي خطوتين .. لاكساه الليل بااللون الحزين ..
يوم مدلها يده ..
كانت الرجفه لقا ..
ودعت فيها الشقا ..
وتركت بين الاصابع عطرها ..
وعمرها .. ما جت على وقت الوعد ..
إلا ذاك اليوم ..
و عمرها .. ما بكت .. و ما ضحكت ..
ما حكت له .. واسكتت
مثل ذاك اليوم ..
كانت أجمل من خياله .. كانت انظر ..
كانت أكثر ...من أماني عمره الظامي حنين ..
و اختفت .. من كساها الليل باللون الحزين

اختفت في الطريق اللي معه ..
كانت تجيه ..
كيف دربٍ جمعه معها .. خذاه ..
ليتها اختارت سواه ...
تزرع القرقا لياليها .. عليه ..
وحسايف ... حسايف ..


(( طالت علي المسافة ))
يا صاحبي طالت علي المسافه
كل ما نشدتك قلت لي الدرب قدام

وعدك مثل باكر أحبه وأخافه
ولا ينقضي باكر على طول الأيام

ما اقول ضاع العمر عندك حسافه
انت الدقايق عشتها وانت الاعوام

ودي ربيع العمر يسبق جفافه
يا مسقي العطشان من كاس الأوهام

كانك تعاف الجرح حنا نعافه
وما سهرت عيوني تبي عينك تنام

ومن لا ذكر منك جميل خلافه
ما يملكه وعد ترى السعد قدام


(( الغضب ))

نشي غيظي .. سحابٍ أسودٍ في موسم الدخان
ترزم .. وأمطر بجمرٍ غدا له بالحشى صالي

غضبت .. وما دريت إن الغضب ياصاحبي إنسان
وسيمٍ مثل سلة سيف.. وقلبه أسودٍ بالي

هدمت الدار من قل الحصى لأجل أرجم الخلان
وقتلت النور .. من كثر الجفا با فارق ظلالي

وحثيت الريح..في وجه التراب وهبت القيعان
تحت أقدامي .. ومرت ديار وودعت غالي

ويوم أصحت سما نفسي .. تلفتت وصرخت .. فلان
قمر وجهك .. وشمس الدار في دمعي تغايا لي

وقفت .. وكانت الفرقا .. مشيت ولا حصل نسيان
بكيت .. ولا سقاني الدمع لا مرٍ ولا حالي

غريبٍ تزرع عيوني سراب .. وتحصد الكثبان
وحيدٍ مثل رسمٍ مبطيٍ في صحصحٍ خالي
يتبع..

ديوان ومض

(( ثقلت خطاي ))
ثـقلت خـطاي وكـن الايـام فوقي
صـخر الجبال وتحتي الريح والعج

لا والله الا صـار مـا ارجيه عوقي
غـير الـذي عـن طلبته ما تحرج

يـا الله يـا مضوي السما بالبروقي
ويـا مـخرج وبل السحابه من اللج

تـمطرني بـرحمتك وتـفك عوقي
وتجعل لي من الضيقات والهم مخرج

أنـا مـثل حـر تـخاطف سبوقي
يـد الـعمر والياس والحظ الاعرج

كـم غـارة صـاليت وافـتك نوقي
وكـم طعنه عانيت من غير ما احتج

ويـاما رفـيت مـن الـليالي فتوقي
ويـاما عطيت وللعطا كنت الاحوج

مـرحوم يـا من شيمته في عروقي
دم وفــي فـكري سـجاياه مـنهج

مـشيت دربـك لـين وقف خفوقي
مـن الـتعب مبعدك يا الفجر الابلج




بعد ذلك قدم الأمير للحضور الشاعر نايف صقر ..
والذي صعد للمنصة وتحدث قليلا عن البدر ..
وذكر بأن هناك الكثير من الامور التي تجمع بينه وبين البدر ..
ومنها أن كلاهما يحمل نفس أسم الوالدة .. ( وضحى ) ..
بعد ذلك ألقى نايف صقر ثلاث قصائد من قصائد بدر عبدالمحسن ..
وكانت الاولى :

(( البتول ))

كل أرض تشيلك ياثقيل الحمول ..
وكل وقت كريم بالرضا والزعل

وين مارحت تلقى لك حبيب وعذول ..
وين ماكنت تلقى مثل ياسك أمل

ياطريق الترجي والوله والنحول ..
والله إني مشيتك لين حد الثمل

لا تظن المسافر من يسوق الرحول ..
من وقف دون حلمه عاجز ما رحل

وما لمخلوق منجا في الحذر والجفول ..
ماتصيب السهام ولا يطيش الأجل

الليالي خوات مير منهي البتول ..
والحوادث عشاير مير وين الفحل

اتذكر في عين الشمس طفل خجول ..
شالته في هدبها وقت لين اشتعل

أعجب الناس وهجه بالجدل والفضول ..
مادروا عن جمال الجرح لين إندمل

إن لثمت الزهور وصاحبتني الحقول ..
ماهقيت إن صافي الشهد عيب النحل

إن تعبنا نحب ولا لقينا قبول ..
ماتسر الأماني ولا يفيد العذل

مابقى في ضلوعي كود ريح معمول ..
وثوب شاش عليه من الندامه وحل

لكن الله كريم .. وكل هم يزول ..
ماعلى الله بعيد .. ولو جفاك المحل

بعد ذلك ألقى نايف صقر القصيدة الثانية :

(( الأربعين ))

ادري ان الوقت يذهـب مـا يعـود
اربـعـيــنٍ فـارقـتـنـي يـالـعـنــود

ماطـر الايـام مـن غـيـم الـزمـان
مـا يبـل الريـق لـو مهمـا يجـود

كـم شربتـه صافـيٍ بــارد قــراح
ما دريت ان الظمـا سـر الوجـود

كل شمسٍ تلمـس اشجـار العمـر
تحـرق الاوراق وتـجـف الفـنـود

وكـل ريـحٍ تـدفـع شــراع العـمـر
ينقطـع بـه حبـل ويميـل العمـود

اربعـيـن مــرت وتـونـي صغـيـر
انتظـر لعـل تصـدق لـي الوعـود

والغريب انـي علـى هـذا مغبـوط
ادري اني بخير لا شفت الحسود

الـزمـن يـــا بنـيـتـي كـلــه زوال
مـا تخلـد كـود لحظـات السجـود



ثم اختتم نايف صقر فقرته بإلقاء قصيدة ثالثة من قصائد البدر وهي :


(( مناكيف ))
في دربكم ياراحلين مناكيف
تالي ليالي القيظ واول خريفه

ردو سلام اهل القلوب المواليف
على الوليف اللي نشد عن وليفه

ردوه لعذوق النخيل المهانيف
وعلى القصور اللي بوادي حنيفه

دار لها بالقلب عشق وتكاليف
ياعل عين ماهوتها كفيفه

طبنا وشبنا واتعبتنا المشاريف
والمرقب العالي هبوبه عنيفه

ياواردين العد كفو المذاريف
اللي بقى دمع هماج ذريفه

والله لودمي يغيث الملاهيف
قطعت عرقه لين يصفي نزيفه